Молитва супругов о даровании детей

Услыши нас, Милосердный и Всемогущий Боже, да молением нашим ниспослана будет благодать Твоя. Будь милостив, Господи, к молитве нашей, вспомни Закон Твой об умножении рода человеческаго и буди милостивым Покровителем, да Твоею помощию сохранится Тобою же установленное. Ты властною силою Твоею из ничего все сотворил и положил начало всего в мире существующего – сотворил и человека по образу Своему и высокою тайною освятил союз супружества и предуказание тайны единения Христа с Церковью. Призри, Милосердный, на рабов Твоих сих (имена), союзом супружеским соединенных и умоляющих о Твоей помощи, да будет на них милость Твоя, да будут плодовиты и да увидят они сына сынов своих даже до третьяго и четвертаго рода и до желаемой старости доживут и войдут в Царство Небесное через Господа нашего Иисуса Христа, Которому всякая слава, честь и поклонение подобает со Святым Духом во веки.

Молитва о зачатии на Рождество Пресвятой Богородицы

О, Пречистая и Преблагословенная Дева, у Бога святыми молитвами испрошенная, Богу посвященная, Богом возлюбленная, и чистоты ради души и тела Твоего Матерью Сына Божиего, Господа нашего Иисуса Христа избранная.

Кто Тебя не ублажит или кто не воспоет Твоего преславного рождества ибо Рождение Твое это начало спасения нашего. Прими от нас, недостойных, хвалу тебе и не отринь мольбу нашу. Твое величие исповедуем, к Тебе во умилении припадаем и скорую в заступлении чадолюбивую и благоусердную Матерь просим: испроси Сына Твоего и Бога нашего дать нам грешным, искреннее покаяние и благочестивую жизнь, да возможность жить Богу угодно и душам нашим полезно. О Преблагословенная Дева Мария, Царице небес и земли, призри милостиво на рабов Твоих которые не смогли еще разродиться потомством и Твоим всесильным ходатайством ниспосли им исцеление от неплодства. О Богородица и Питательница жизни нашей, буди нам в помощь и верные чада Святой Церкви спаси, мольбы наши услышь, болящих уврачуй, скорбь утоли, мужество ко благу направи. Темже смиренно к Тебе прибегаем и просим: испроси нам у Всемилостивого Господа Бога прощение всех грехов наших вольных и невольных, страждущему отечеству нашему спасения, мира, тишины и благочестия. И все, что жизни и спасению нашему так необходимо, испроси нам у Сына Твоего, Христа Бога нашего. Ты надежда наша в час смерти, даруй нам христианскую кончину, и наследие вечных и неизреченных благ Царства Небесного. Со всеми святыми неустанно просим тебя о заступничество и славим единого Истинного Бога, во Святой Троице покланяемаго, Отца и Сына и Святого Духа.

Аминь.

Молитва Богородице о даровании детей

О, Пресвятая Дево, Мати Господа Вышняго, скоропослушная заступнице всех, к Тебе с верою прибегающих! Призри с высоты небеснаго величия Своего на меня непотребную, припадающую к иконе Твоей, услыши скоро смиренную молитву мене грешной и принеси ю к Сыну Своем; умоли Его, да озарит мрачную душу мою светом Божественный благодати Своея и очистит ум мой от помыслов суетных, да успокоит страждущее мое сердце и исцелит раны его, да вразумит мя на добрая дела и укрепит работати Ему со страхом, да простит вся соделанная мною злая, да избавит вечныя муки и не лишит Небеснаго Своего Царствия. О, Преблагословенная Богородице! Ты благоизволила еси нарещися во образе Своем Грузинской, повелевающи всем притекати к Тебе с верою, не презри убо мене скорбнаго и не попусти погибнути мне в бездне грехов моих. На Тя по Бозе все мое упование и надежда спасения, и Твоему покрову и предстательству поручаю себе во веки. Славлю и Благодарю Господа, что послал мне счастие супружеского состояния. Молю Тебя, Матерь Господа и Бога и Спасителя моего, да Твоими Матерними молитвами пошлет мне и супругу моему возлюбленному чадо. Да дарует Он мне плод чрево моего. Да устроится он волею Его, во славу Его. Перемени скорби души моей на радость зачатия во чреве моем. Да славлю и благодарю Тебя Матерь Господа моего во вся дни жизни моей. Аминь.

Пред иконой Божией Матери Грузинская о разрешении неплодства

Приими, всеблагомощная Пречистая госпоже Владычице Богородительнице, сия честныя дары от нас, недостойных рабов Твоих, к Твоему цельбоносному образу пение возсылающих со умилением, яко Тебе Самой сущей ту и послушающей моления наша и подающи с верою просящим по коемуждо прошению и исполнение: скорбящим скорби облегчаеши, немощным здравие даруеши, расслабленных и недужных исцеляеши и от бесных бесы прогониши, обидимыя от обид избавляеши, и насилуемых спасаеши, грешных прощаеши, Прокаженных очищаеши и малых детей милуеши, и неплодныя от неплодства разрешаеши. Еще, госпоже Владичице, от уз и темниц свобождаеши и всякия многоразличныя страсти исцеляеши и очныя болезни уврачуеши и от смертоносныя язвы избавляеши: вся бо возможна суть ходатайством Твоим к Сыну Твоему, Христу Богу нашему. О всепетая Мати, Пречистая Богородице! Не престай молити о нас недостойных раб Твоих, славящих Тя и почитающих, и поклоняющихся Пречистому образу Твоему, и надежду имущих невозвратну, и веру несумненну, к Тебе Приснодеве, преславней и непорочной, славящих и чтущих, и поющих Тя во веки веков.

Аминь.

От святыя иконы Твоея, о Владычице Богородице, спасение и цельбы подаются всем с верою и любовию приходящим к ней. И мою немощь посети, и душу мою помилуй, Благая, и тело мое изцели благодатию Твоею, Пречистая.

Пред иконой Божией Матери Толгская о разрешении неплодства

Приими, о Всеблагословенная и Всемощная, Пречистая Госпоже Владычице, Богородице Дево, сия молитвы, со слезами Тебе ныне приносимыя от нас, недостойных рабов Твоих, к цельбоносному образу Твоему со умилением притекающих, яко Тебе Самей ту сущей, и слышащей моления наша, и подающей с верою просящим по коемуждо прошению исполнение. Скорбящим бо скорби облегчаеши, немощным здравие даруеши, разслабленных и недужных исцеляеши, от бесных бесы прогоняеши, обидимыя от обид избавляеши и гибнущия спасаеши, грешных кающихся прощаеши, прокаженных очищаеши, малых детей милуеши, от уз и темниц свобождаеши, и всякия многоразличныя страсти врачуеши Ты, Госпоже Владычице Богородице: вся бо суть возможна ходатайством Твоим к Сыну Твоему, Христу Богу нашему. О Всепетая Мати, Пресвятая Богородице Дево Марие! Не престай молитися о нас, недостойных рабех Твоих, славящих Тя и почитающих, и поклоняющихся пречистому образу Твоему, и надежду имущих невозвратну и веру несумненну к Тебе, Приснодеве Преславней и Непорочней, ныне и присно, и во веки веков.

Аминь.

Днесь светло сияет на Толге образ Твой, Пречистая Дево Богородице, и, яко солнце незаходимое, всегда верным подадеся, Егоже видев на воздусе, невидимо Ангелы, яко никим, держима, преосвященный епископ града Ростова Трифон тече ко явленному светящемуся столпу огненну, и по водам, яко по суху, прейде, и моляшеся Ти верно о пастве и о людех. И мы, к Тебе притекающе, зовем: Пресвятая Дево Богородице, верно Тя славящих спасай, страну нашу, архиереев и вся Российския народы от всех бед избавляй по велицей Твоей милости.

Пред иконой Божией Матери Иверская Монреальская о разрешении неплодства

О, Преславная Госпоже, Царице Небесе и земли, Дево Богородице! Пред честною иконою Твоею ныне припадающе, умиленным сердцем вопием Тебе малое моление сие наше, яко раби неключими есмы, осуждение прияти имущии, но Твоим всемощным ходатайством Судии умилостивления чающии. Веруем и уповаем, Владычице, яко не хотяй смерти грешных Сын Твой ходатайству Твоему внемлет, и ныне известихомся о сем чудным знамением от иконы Твоея мироточивыя, от неяже и исцеления обильно источила еси всем с верою и любовию к Тебе притекающим. Сего ради и вопием Тебе со слезами: пощади окаянство наше, прости нам неверность нашу, сокруши гордыни нашея превозношение, отжени нечувствие от сердец ожесточенных, призри на воздыхание унынием боримых, уцеломудри нас будущаго воздаяния ожиданием. И подаждь, Госпоже, Церкви нашей в истине неколебимое стояние и в любви благое возращение, от всех козней бесовских и суемудрии еретических покрый нас и расточенныя верныя собери воедино, да вси на земли православно Тя славящии и в Небесных чертозех воспети сподобятся всечестное имя Святыя Троицы и Твое милостивное о нас заступление во веки веков.

Аминь.

От святыя иконы Твоея, о Владычице Богородице, миро благодатное источила еси обильно, верныя Твоя во изгнании сущия утешила еси и неверныя светом Сына Твоего просветила еси. Темже и припадаем к Тебе, Госпоже, со слезами: милостива нам буди в час судный, да некако толикую милость Твою восприявше, яко презорливи наказани будем, но подаждь нам Твоими молитвами плод духовный принести и спаси души наша.

Святому пророку Захарии и Елисавете о разрешении неплодства

Боже святый и во святых почиваяй, трисвятым гласом на небеси от ангел воспеваемый, на земли от человек во святых Своих хвалимый, давый Святым Твоим Духом коемуждо благодать по мере дарования Христова, и тою поставивый Церкви Твоей Святей овы апостолы, овы пророки, овы же благовестники, овы пастыри и учители, ихже словом проповеди, Тебе Самому действующему вся во всех, мнози совершишася святии в коемждо роде и роде, различными благодетельми благоугодившии Тебе, и к Тебе, нам образ добрых подвигов своих оставивше, в радости прешедший, готови, в немже сами искушсни быша, и нам напаствуемым помогати. Сих святых всех и святого пророка Захарию и праведную Елисавету воспоминая и их богоугодное похваляя житие, Тебе Самаго, в них действовавшаго, восхваляю, и онех благотворения Твоя дарования быти веруя, прилежно молю Тя, Святе святых, даждь ми грешному последовати их учению, житию, любви, вере, долготерпению, и их молитвенною помощию, паче же Твоею вседействующею благодатию, небесныя с ними сподобитися славы, хваляще Пресвятое имя Твое, Отца и Сына и Святаго Духа во веки. Аминь.

О, преблаженнии угодницы Божии, вси святии, предстоящии Престолу Пресвятыя Троицы и наслаждающиися неизреченнаго блаженства! Се ныне, в день общаго вашего торжества, милостивно призрите на нас, меньших братии ваших, приносящих вам сие хвалебное пение, и ходатайством вашим просящих милости и отпущения грехов у Преблагаго Господа; вемы бо, воистину вемы, яко вся, елика восхощете, испросити у Него можете. Темже убо смиренно молимся вам, и святому пророку Захарии и праведной Елисавете, молите Милостиваго Владыку, да подаст нам дух вашея ревности к хранению святых Его заповедей, яко, да текше по стопам вашим, возможем земное поприще в добродетельном житии без порока прейти, и в покаянии достигнути преславных селений райских, и тамо купно с вами прославляти Отца и Сына и Святаго Духа, во веки веков. Аминь!

К вам, о святии вси и святый пророче Захария и праведная Елисавета, яко путеводным светильникам, деяньми своими осветившим путь небеснаго восхода, аз многогрешный смиренно колена сердца моего преклоняю и из глубины души взываю: умолите о мне Человеколюбца Бога, да не попустит ми еще блуждати по распутиям греха, но да просветит мой ум и сердце светом благодати Своея, яко да тою озаряем и подкрепляем, возмогу прочее время земнаго жития правою стезею нспреткновенно преити и ходатайством вашим к Преблагому Господу сподоблюся, поне вмале причастник быти духовныя вашея трапезы в небесном чертозе Царя славы. Емуже со Безначальным Его Отцем и Пресвятым, Благим и Животворящим Духом буди слава, честь и поклонение во веки веков. Аминь.

О, святые угодники Божии пророче Захария и праведная Елисавета, подвигом добрым подвизались на земли, восприяли еси на небесех венец правды, егоже уготовал еси Господь всем любящим Его; темже взирающе на святую икону вашу, радуемся о преславнем скончании жительства вашего и чтем святую память вашу. Вы же, предстоя Престолу Божию, приимите моления наша и ко Всемилостивому Богу принесити, о еже простити нам всякое прегрешение и помощи нам стати противу кознем диавольским, да избавльшеся от скорбей, болезней, бед и напастей и всякаго зла, благочестно и праведно поживем в нынешнем веце и сподобимся предстательством вашим, аще и недостойни есмы, видети благая на земли живых, славяще Единаго во святых Своих славимаго Бога, Отца и Сына и Святаго Духа, ныне и во веки веков. Аминь.

Праведных твоих Захарии и Елисаветы, Господи, память празднующе, теми молим Тя: спаси души наша.

Священства одеждею обложен, премудре, по закону Божию всесожжения приятна священнолепно приносил еси, Захарие, и был еси светильник и зритель тайных, знамения в тебе благодати нося явственно, всемудре, и мечем убиен быв в храме Божии, Христов пророче, с Предтечею моли спастися душам нашим.

Пророк днесь и священник Вышняго, Захариа предложи, Предтечев родитель, трапезу своея памяти, верныя питая, питие бо правды всем растворив, сего ради скончавается, яко Божественный таинник Божия благодати.

Яко луна полна, Свет Правды от Мысленнаго Солнца Мессии прияла еси, и во всех заповедех Господних с Захарием ходила еси, Боговозлюбленная Елисавето. Достойными убо тя песньми ублажающе, Всещедраго Света, просвещающаго всех, Господа величаем.

Праведным богоотцам Иоакиму и Анне о разрешении неплодства

О святии праведницы, Богоотцы Иоакиме и Анно! Молите Милосердаго Господа, яко да отвратит от нас гнев Свой, по делом нашим праведно на ны движимый, и да безчисленная прегрешения наша презрев, обратит нас, раб Божиих (имена), на путь покаяния, и на стези заповедей Своих да утвердит нас. Таже молитвами вашими в мире жизнь нашу сохраните, и во всех благих благое поспешение испросите, вся к животу и благочестию потребная нам от Бога дарующе, от всяких напас тей и бед и внезапныя смерти предстательством вашим нас избавляюще и от всех враг видимых и невидимых защищающе, и тако в мире временное сие житие прешедше. в вечный достигнем покой, идеже вашим святым умолением да сподобимся Небеснаго Царствия Христа Бога нашего, Емуже со Отцем и Пресвятым Духом подобает всякая слава, честь и поклонение во веки веков.

О приснославнии Христовы праведницы, святии Богоотцы Иоакиме и Анно, предстоящии небесному престолу Великаго Царя и велие дерзновение к Нему имущии, яко от Преблагословенныя Дщери вашея, Пречистыя Богородицы и Приснодевы Марии, воплотитися изволившему, к вам, яко многомощным предстателем и усердным о нас молитвенникам, прибегаем мы грешнии и недостойнии. Молите благость Его, яко да отвратит от нас гнев Свой, по делом нашым праведно на ны движимый, и да безчисленныя прегрешения наша презрев, обратит нас на путь покаяния и на стезе заповедей Своих да утвердит нас. Таже молитвами вашими в мире живот наш сохраните и во всех благих благое поспешение испросите, вся яже к животу и благочестию потребная нам от Бога дарующе, от всяких напастей и бед и напрасныя смерти, предстательством вашим нас избавляюще, и от всех враг видимых и невидимых защища юще, яко да тихое и безмолвное житие поживем во всяком благочестии и чистоте, и тако в мире временное сие житие прешедше, в вечный достигнем покой, идеже вашим святым умолением, да сподобимся Небеснаго Царствия Христа Бога нашего, Емуже со Отцем и Пресвятым Духом подобает всякая слава, честь и поклонение во веки веков.

Аминь.

Иже в законней благодати праведни бывше, Младенца богоданнаго породиша нам, Иоаким и Анна. Темже днесь светло торжествует, весело празднующи божественная Церковь, честную вашу память, славящи Бога, воздвигшаго рог спасения нам в дому Давидове.

Избраннии от человеческаго рода прародителие Христовы, рождшии Преблагословенную Богоотроковицу, из Неяже по плоти сын Божий родися, святии и праведнии Богоотцы Иоакиме и Анно! Яко имущии дерзновение велие ко Христу Богу, и выну предстоящии престолу Его небесному, Тому прилежно молитеся от бед нам избавитися, да выну зовем вам: Радуйтеся, святии и праведнии Богоотцы Иоакиме и Анно.

Ангел предстатель послан бысть к вам от Бога, святии и праведнии Богоотцы Иоакиме и Анно, егда о безплодии своем ов убо в пустыни, ова же в саду своем сетовасте, к Богу молитву возносяще; и тако благовестие радостное принесе безплотный, яко родити имате Дщерь Преблагословенную, о Нейже возблагословится весь род человеческий, с ним же и мы вам радостное приносим хваление: Радуйтеся, корене Давидова святопроцветшия розги винограда животнаго; Радуйтеся, рождшии Дщерь, от всех родов преблагословенную. Радуйтеся, воплощшагося Сына Божия прародителие всечестнии; Радуйтеся, таинства от века утаеннаго проявителие всеизряднии; Радуйтеся, Утехи Израилевы ближайшии по плоти сродницы; Радуйтеся, обетованнаго миру Спасителя единокровнии южицы. Радуйтеся, святии и праведнии Богоотцы Иоакиме и Анно.

Видев себе святый Иоаким, во храме Иерусалимстем безплодия ради от архиерея уничиженна, зело опечалися, и в горести души своея в пустыню к своим стадом удалися, и тамо со многими слезами тепле ко Господу моляшеся, да сподобит его отцем своему чаду нарещися, и тако к молитве же пост прилагаше, и в сокрушении сердца Вседержителю Богу взываше: Аллилуиа.

Силу горести мужа своего святая Анна уведевши, в дому своем седящи, горце плакася и моляшеся ко Господу, да поношение безплодия от нея отъимет. Мы же, толикое терпение праведных поминающе, воззовем: Радуйтеся, Богоизбранная двоице, Единому от Троицы Матерь по плоти породившая. Радуйтеся, Зиждителю вашему Родительницу непорочную произведшии. Радуйтеся, супрузи благословеннии, Преблагословенную в женах Дщерь. воспитавшии; Радуйтеся, в безплодии вашем от Господа услышаннии. Радуйтеся, яко слезныя молитвы ваша проникоша небо и во ушию Бога Израилева достигоша; Радуйтеся, яко поношение ваше временное во славу вечную на небеси и на земли изменися. Радуйтеся, святии и праведнии Богоотцы Иоакиме и Анно.

Силою Божиею преисполнен, явися ангел Господень святому Иоакиму в пустыни и рече ему: услыша Бог молитву твою и изволи дати тебе благодать Свою, се бо жена твоя Анна зачнет, и породит тебе Дщерь, о Нейже всему миру будет радость: сия рек безплотный, повеле ему ко храму Иерусалимскому паки отъидти, идеже он супругу свою молящуся обрящет, с нею же вкупе да воспоет тамо хвалебную песнь Богу израилеву: Аллилуиа.

Имущи скорбь велию в сердце своем, Анна святая, и в вертоград дома своего вшедши, виде гнездо птичье на древе сооружено, птенцы малыя в нем лежащыя, абие моления к молениям прилагати потщася, да сподобит ю Господь матерь чаду быти. И се явися ей ангел Господень глаголя: услышана есть молитва твоя и воздыхания твоя проидоша облаки, слезы же твоя пред Бога внидоша: се зачнеши и родиши Дщерь Преблагословенную, о Нейже возблагословятся вся колена земная, и Тою дастся спасение всему миру, наречется же имя Ей Мария; таковое ангельское всерадостное благовещение поминающе, воспоим Богоотцем таковая: Радуйтеся, супрузи праведнии, от Бога свыше предизбраннии; Радуйтеся, во всех заповедех Господних без порока ходившии. Радуйтеся, в скорби вашей временней утешение вечное получившии; Радуйтеся, паче чаяния вашего десницею Божиею превознесеннии. Радуйтеся, яко во смирении вашем и скорби, помяну вы Господь; Радуйтеся, яко сподобистеся прародителие Сыну Божию быти. Радуйтеся, святии и праведнии Богоотцы Иоакиме и Анно.

Бурею сомнения Иоаким праведный содержим и о благовестии ему ангела недоумевая, абие во град Иерусалим отъиде, идеже пред враты храма святую Анну обрете, Господа вельми славословящую и радость ангельскаго явления и о чаде проречения ему возвещающу, тем же и о своем видении супружнице благовестив, вкупе с нею возопи ко Господу: Аллилуиа.

Слышавше сродницы и знаемии о преславном святыя Анны зачатии, Бога Израилева славляху, Анна же богомудрая, плод чрева своего на служение Богу обрече, теплое благодарение Господеви возношаше, мы же светло всеславное зачатие Богоотроковицы Марии воспевающе, Тоя святым родителем глаголем сице: Радуйтеся, радостнии нам грядущаго в мир Искупителя провозвестницы; Радуйтеся, присно поминаемии чаемаго Спасителя праотцы. Радуйтеся, чрез Дщерь вашу благословенную, Слову Божию плоть взаимодавшии; Радуйтеся, Бога воплощенна внука себе нарицающии. Радуйтеся, велией благочестия тайны достойнии служителие; Радуйтеся, Божия к человеком снисхождения всеизряднии посредницы. Радуйтеся, святии и праведнии Богоотцы Иоакиме и Анно.

Богосветлую звезду явльшую солнце правды Христа Бога, Пресвятую Богородицу, плотию родити сподобистеся, и вожделенное имя Богоотцев приясте, Иоакиме и Анно всеблаженнии, о Еяже рождестве святем небо и земля возрадовашася, и весь род человеческий освятися, вопия дивному во святых Своих Богу Израилеву: Аллилуиа.

Видевше родители от них рождшуюся Богоотроковицу Марию, Зиждителеву же Матерь, яко кивоту Божию, благоговейно Той послужиша, темже и нас, к вам молитвенно припадающих, не отвратитесь, глаголющих: Радуйтеся, в рождестве Богоотроковицы Марии светло возликовавшии; Радуйтеся, видением Богоотроковицы услажденнии. Радуйтеся, слышанием Ея умиленнии; Радуйтеся, по сих от архиерея Божия благословеннии и ублаженнии. Радуйтеся, Агницу непорочную в дому своем добре упасшии; Радуйтеся, Агнца и Пастыря Матерь во Дщерь себе приемшии. Радуйтеся, святии и праведнии Богоотцы Иоакиме и Анно.

Проповедницы чудес Божиих явистеся святии, егда обет свой Богови совершисте и трилетнюю Богоотроковицу Марию в храм Божий со славою введосте, да обитает тамо во Святая святых, о сих убо радостно Богу отец ваших славословия песнь воспевати потщастеся: Аллилуиа.

Возсия Богоотроковица яко луна полная в честнем Своем в храм Господень вхождении, Еяже чистоте ангелы удивляхуся, и архиерей Божий Захария прием Ю от рук ваших, святии Иоакиме и Анно, во внутренняя Святая святых с честию введе, яко воистину одушевленный Божий Кивот, вас же по достоянию ублажи хваленьми таковыми: Радуйтеся, радость всемирную роду человеческому породившии; Радуйтеся, виновницу человеческаго обновления воспитавшии. Радуйтеся, в храм Господень Кивот одушевленный Божий приведшии; Радуйтеся, Дщерь вашу святую, во Святая святых вместившии. Радуйтеся, Богу воплотитися хотящему сродницы являющиися; Радуйтеся, ангелом собеседницы бывшии. Радуйтеся, святии и праведнии Богоотцы Иоакиме и Анно.

Желание души твоея исполнив, и обет твой Богови воздав, Иоакиме преблаженне, в старости добрей свято и праведно жизнь земную о Господе скончал еси. Темже ныне Тому и о нас сотвори молитву, да благую, мирную и непостыдную кончину получити сподобимся, зовуще Ему: Аллилуиа.

Новое и богоугодное житие во вдовстве твоем Анно святая, провождала еси, у храма Божия приметающися и Святей и Преблагословенней Дщери твоей сослужащи, темже яко истинную и богоугодную вдовицу, Христову же прабабу тя восхваляем, вкупе же и мужа твоего, богоотца Иоакима, усердно чествуем и с любовию песни таковыя вам приносим: Радуйтеся, праведницы, ихже правда яко солнце сияет во веки; Радуйтеся, ангелом друзи, сожителие святым и приснии Богу. Радуйтеся, ближнии небеснаго престола предстоятелие; Радуйтеся, дерзновение велие ко Христу Богу имущии. Радуйтеся, Церкве на небеси торжествующия украшение; Радуйтеся, Церкве воинствующия на земли доброе заступление. Радуйтеся, святии и праведнии Богоотцы Иоакиме и Анно.

Странствие земное совершив, святая и праведная Анно, на руках пребожественныя твоея Дщери, Богородицы Марии, сном смертным почила еси и к Богу со упованием преставилася еси, темже святое успение твое славяще, молим тя, о богопраматерь всечестная, да егда и мы сном смертным усыпати начнем, умоли Спаса Христа, кротко душу нашу от тела отделити и бесовския власти ю избавити, спасения же вечнаго нас удостоити, да зовем Ему в радости святых: Аллилуиа.

Весь мир христианский блажит вас по достоянию, святии и праведнии Богоотцы Иоакиме и Анно, и молитвенно ваша честная имена прославляет, Церковь же Христова светло память вашу празднует и песни хвалебныя вам приносит сице: Радуйтеся, светильницы, мрак душ наших благодатно озаряющии; Радуйтеся, от горних высот славы вашея к земнородным милостиво проницающии. Радуйтеся, Богородице Марии сомолитвенницы всегдашнии; Радуйтеся, Христа Бога умилостивителие многомощнии. Радуйтеся, любовь и веру к вам имущих от всяких бед спасающии; Радуйтеся, молитвенно на помощь вас призывающих от напрасныя и наглыя смерти избавляющии. Радуйтеся, святии и праведнии Богоотцы Иоакиме и Анно.

Вси ангели Божии и лицы святых Божиих на небеси вас, святии и праведнии богоотцы Иоакиме и Анно, целуют, роди же человечестии на земли молитвенными песньми вас похваляют и о предстательстве вашем благодарно вопиют Богу: Аллилуиа.

Ветийства наша не довлеют к достойной вам похвале, святии прародителие Христовы: обаче вы, милостивы суще, и наша убогая хваления не отвратите, но будите о нас теплии предстатели и молитвенницы ко Господу, вашими святыми молитвами скудость душ наших восполняюще, да благодарственне вам зовем: Радуйтеся, радости и славы вечныя вожделении нам ходатаи; Радуйтеся, благ временных и вечных усерднии нам пред Господем ходатаи. Радуйтеся, от смертоносныя язвы предстательством вашим верныя сохраняющии; Радуйтеся, тлетворныя ветры молитвами вашими разгоняющии. Радуйтеся, трясение земли и бури зельныя ходатайством вашим установляющии и в тишину прелагающии; Радуйтеся, во всяких бедах и злоключениих на помощь к нам ускоряющии. Радуйтеся, святии и праведнии Богоотцы Иоакиме и Анно.

Спасения душевнаго желающым и о сем усердно подвизающымся помощницы блазии, святии и праведнии Богоотцы Иоакиме и Анно явистеся, ов убо иноком, ова же инокинем хранители именуетеся, общее моление за всех верных Богу приносяще, да вси благодарственно зовут прославльшему вас во вселенней, Царю Славы Христу: Аллилуиа.

Стеною молитв ваших небесных, святии и праведнии Богоотцы Иоакиме и Анно, сохраняйте и ограждайте нас от искушений врага диавола, ищущаго душевней погибели нашей: вемы бо, вемы, яко много может молитва ваша пред лицем Христа Бога нашего, вашего же по плоти внука. Его же умоляти не престайте о всех, с любовию вас почитающих и вопиющих: Радуйтеся, маслина благоплодная, елей милости Божией обильно нам источающая; Радуйтеся, кипариси двое благосеннолиственнии, зной страстей наших в покой без страстия приводящии. Радуйтеся, виссоне и багряницо, из нихже скиния Божия селения соорудися; Радуйтеся, горлицы единосупружнии, голубицу непорочную произведшии. Радуйтеся, со Дщерию вашею, всех Царицею вечно царствующии; Радуйтеся, в Сионе горнем в обители Ея небесней светло торжествующии. Радуйтеся, святии и праведнии Богоотцы Иоакиме и Анно.

Пение наше хвалебное милостивно приимите, и щедрот ваших молитвенных нас не лишите, о святии прародителие Христовы Иоакиме и Анно, аще и недостойнии есмы грехов ради наших, вашего святаго заступления: обаче яко блази и всещедри суще, сие нам подадите, и помозите нам покаянием очиститися от скверны греховныя, да в чистоте сердец воспоем Создателю нашему хвалебную песнь: Аллилуиа.

Светоподательныя два светильника, всемирную свещу возжегшии, познаим святых Богоотец Иоакима и Анну, о братие, и сиянием тех небесныя славы озаряеми, воспоим им таковая: Радуйтеся, славнейшую без сравнения серафим воспитати удостоившиися; Радуйтеся, лучами благодати Божия осияннии. Радуйтеся, благоухания духовнаго преисполненнии; Радуйтеся, фимиам молитв ваших о всем мире христианстем Богу приносящии. Радуйтеся, с Богородицею Мариею и Предтечею Иоанном у престола Христова выну предстоящии. Радуйтеся, святии и праведнии Богоотцы Иоакиме и Анно.

Благодать Божию и милость нам подати, прощение же грехов и исправления жития ниспослати просите нам у Господа, святии Богоотцы Иоакиме и Анно, и непрестайте о нас пред лицем Вседержителя Бога моляще, яко стяжавшии к нему дерзновение многое. О сем усердно к вам припадающе, яко присных предстателей и заступников наших, просим и благоумиленно зовем всех Творцу: Аллилуиа.

Поюще многомощное предстательство ваше к Богу, Иоакиме и Анно праведнии, величаем возвеличившаго вас Христа Господа, воспеваем и рожденную от вас пренепорочную Его Матерь, вам же от усердия нашего сия достодолжныя похвалы приносим: Радуйтеся, от востока и до запада препрославленнии; Радуйтеся, стражие божественнии, неусыпно бдящии в молитвах к Богу о всех верных. Радуйтеся, помощь вашу благодатную всяцей душе христианстей подающии; Радуйтеся, во благих моления и прошения благочестивых исполняющии. Радуйтеся, душевных и телесных недугов преизряднии и безмезднии целители; Радуйтеся, благ временных и вечных всеусерднии и благоприятнии нам ходатаи. Радуйтеся, святии и праведнии Богоотцы Иоакиме и Анно.

О святии и праведнии Богоотцы Иоакиме и Анно! Молим вас со усердием и любовию, к подножию ног ваших припадающе: умолите Господа Бога, избавити нас от погибели вечныя, грешником уготованныя, да милосердием Бога нашего спасаеми, и вашими святыми молитвами поспешествуеми, благодарственно воспоим Ему ангельскую песнь: Аллилуиа.

Ангел предстатель послан бысть к вам от Бога, святии и праведнии Богоотцы Иоакиме и Анно, егда о безплодии своем ов убо в пустыни, ова же в саду своем сетовасте, к Богу молитву возносяще; и тако благовестие радостное принесе безплотный, яко родити имате Дщерь Преблагословенную, о Нейже возблагословится весь род человеческий, с ним же и мы вам радостное приносим хваление: Радуйтеся, корене Давидова святопроцветшия розги винограда животнаго; Радуйтеся, рождшии Дщерь, от всех родов преблагословенную. Радуйтеся, воплощшагося Сына Божия прародителие всечестнии; Радуйтеся, таинства от века утаеннаго проявителие всеизряднии; Радуйтеся, Утехи Израилевы ближайшии по плоти сродницы; Радуйтеся, обетованнаго миру Спасителя единокровнии южицы. Радуйтеся, святии и праведнии Богоотцы Иоакиме и Анно.

Избраннии от человеческаго рода прародителие Христовы, рождшии Преблагословенную Богоотроковицу, из Неяже по плоти сын Божий родися, святии и праведнии Богоотцы Иоакиме и Анно! Яко имущии дерзновение велие ко Христу Богу, и выну предстоящии престолу Его небесному, Тому прилежно молитеся от бед нам избавитися, да выну зовем вам: Радуйтеся, святии и праведнии Богоотцы Иоакиме и Анно.

Преподобному Александру Свирскому при желании иметь дитя мужского пола

О, священная главо, ангеле земный и человече небесный, преподобне и богоносне отче наш Александре, изрядный угодниче Пресвятыя и Единосущныя Троицы, многия милости живущим во святей обители твоей и всем, с верою и любовию притекающим к тебе, являяй. Испроси нам вся к житию сему временному благопотребная, паче же к вечному спасению нашему нужная. Пособствуй предстательством твоим, угодниче Божий, правителем страны нашея России. И да в мире глубоце пребудет святая православная Церковь Христова. Буди всем нам, чудотворче святый, во всякой скорби и обстоянии скорый помощниче. Наипаче же в час кончины нашея явися нам, заступниче благосердый, да не предани будем на мытарствах воздушных власти злобнаго миродержца, но да сподобимся непреткновеннаго восхода в Царствие Небесное. Ей, отче, молитвенниче наш присный! Не посрами упования нашего, не презри смиренных молений наших, но присно о нас пред Престолом Живоначальныя Троицы предстательствуй, да сподобимся вкупе с тобою и со всеми святыми, аще и недостойны есмы, в селениих райских славити величие, благодать и милость Единаго в Троице Бога, Отца и Сына и Святаго Духа во веки веков. Аминь.

Преподобному Роману Чудотворцу о разрешении неплодства

О священная главо, преподобне отче, преблаженне авво Романе, не забуди убогих твоих до конца, но поминай нас всегда во святых и благоприятных молитвах к Богу: помяни стадо твое, еже сам упасл еси, и не забуди посещати чад твоих. Моли за ны, отче священный, за дети твоя духовныя, яко имеяй дерзновение к Небесному Царю: не премолчи за ны ко Господу, и не презри нас, верою и любовию чтущих тя: поминай нас недостойных у Престола Вседержителева, и не престай молитися о нас ко Христу Богу, ибо дана тебе бысть благодать за ны молитися. Не мним бо тя суща мертва: аще бо телом и преставился еси от нас, но и по смерти жив сый пребываеши, не отступай от нас духом, сохраняя нас от стрел вражиих и всякия прелести бесовския и козней диавольских, пастырю наш добрый аще бо и мощей твоих рака пред очима нашима видима есть всегда, но святая твоя душа со ангельскими воинствы, со Безплотными лики, с Небесными Силами, у Престола Вседержителева предстояши, достойно веселится, ведуще убо тя воистину и по смерти жива суща, тебе припадаем и тебе молимся: молися о нас Всесильному Богу, о пользе душ наших, и испроси нам время на покаяние, да невозбранно прейдем от земли на небо, от мытарств же горьких, бесов воздушных князей и от вечныя муки да избавимся, и Небеснаго Царствия наследницы да будем со всеми праведными, от века угодившими Господу нашему Иисусу Христу: Ему же подобает всякая слава, честь и поклонение, со Безначальным Его Отцем, и с Пресвятым и Благим и Животворящим Его Духом, ныне и прис но, и во веки веков. Аминь.

В тебе, отче, известно спасеся еже по образу: приим бо крест последовал еси Христу, и дея учил еси презирати убо плоть, приходит бо, прилежати же о души, вещи безсмертней. Тем же и со ангелы срадуется, преподобне Романе, дух твой.

Чистотою душевною Божественно вооружився, и непристанныя молитвы яко копие вручив крепко, пробол еси бесовская ополчения, Романе отче наш, моли непрестанно о всех нас.

Ублажаем тя, преподобне отче Романе, и чтим святую память твою, наставниче монахов и собеседниче ангелов.

Первомученице Евдокии о разрешении неплодства

Правостию умною душу твою привязавши в любовь Христову, тленных и красных, и временных забытием притекла еси, яко Слова ученица: лощением страсти первее умертвивши, страдальчески второе врага посрамила еси. Тем Христос сугубых венцев сподоби тя, славная Евдокие, преподобная страстотерпице, моли Христа Бога спастися душам нашим.

Далее читать молитву всем святым и бесплотным небесным силам.

Боже святый и во святых почиваяй, трисвятым гласом на небеси от Ангел воспеваемый, на земли от человек во святых Своих хвалимый: давый Святым Твоим Духом комуждо благодать по мере дарования Христова, и тою поставивый Церкви Твоей святей овы Апостолы, овы пророки, овы же благовестники, овы пастыри и учители, их же словом проповеди. Тебе Самому действующему вся во всех, мнози совершишася святии в коемждо роде и роде, различными добродетельми благоугодившии Тебе, и к Тебе нам образ добрых подвигов своих оставивше, в радости прешедшии, готови, в нем же сами искушени быша, и нам напаствуемым помогати. Сих святых всех воспоминая и их богоугодное похваляя житие, Тебе Самаго, в них действовавшаго, восхваляю, и онех благотворения Твоя дарования быти веруя, прилежно молю Тя, Святе святых, даждь ми грешному последовати их учению, паче те Твоею вседействующею благодатию, небесныя с ними сподобитися славы, хваляще пресвятое имя Твое, Отца и Сына и Святаго духа во веки.

Аминь.

Мученику младенцу Иоанну Киевопечерскому в разрешении неплодства

Вначале нужно читать молитву всем святым и бесплотным небесным силам (см. выше).

Мученик Твой, Господи Иоанне, во страдании своем венец прият нетленный от Тебе Бога нашего имеяй бо крепость Твою, мучителей низложи, сокруши и демонов немощныя дерзости того молитвами спаси души наши.

Звезда светлая явился еси непрелестная мирови, Солнца Христа возвещающи зарями твоими, страстотерпче Иоанне, и прелесть погасил еси всю, нам же подавши свет, молися непрестанно о всех нас.

Величаем тя, страстотерпче святый Иоанне, и чтем честная страдания твоя, иже за Христа претерпел еси.

Преподобному Евфимию Великому в супружеском неплодстве

Преподобне отче Евфимие! Воззри на нас милостивно и к земли приверженных возведи к высоте небесней. Ты горе на небеси, мы на земли низу, удалены от тебе, не толико местом, елико грехми своими и беззаконии, но к тебе прибегаем и взываем: настави нас ходити путем твоим, вразуми и руководствуй. Вся твоя святая жизнь бысть зерцалом всякия добродетели. Не престани, угодниче Божий, о нас вопия ко Господу. Испроси предстательством своим у Всемилостиваго Бога нашего мир Церкви Его, под знамением креста воинствующей, согласие в вере и единомудрие, суемудрия же и расколов истребление, утверждение во благих делех, больным исцеление, печальным утешение, обиженным заступление, бедствующим помощь. Не посрами нас, к тебе с верою притекающих. Вси православнии христиане, твоими чудесы исполненнии и милостями облагодетельствованнии, исповедуют тя быти своего покровителя и заступника. Яви древния милости твоя, и ихже отцем всепомоществовал еси, не отрини и нас, чад их, стопами их к тебе шествующих.

Предстояще всечестней иконе твоей, яко тебе живу сущу, припадаем и молимся: приими моления наша и вознеси их на жертвенник благоутробия Божия, да приимем тобою благодать и благовременную в нуждех наших помощь. Укрепи наше малодушие и утверди нас в вере, да несомненно уповаем получити вся благая от благосердия Владыки молитвами твоими. О, превеликий угодниче Божий! Всем нам, с верою притекающим к тебе, помози предстательством твоим ко Господу, и всех нас управи в мире и покаянии скончати живот наш и преселитися со упованием в блаженныя недра Авраамова, идеже ты радостно во трудех и подвизех ныне почиваеши, прославляя со всеми святыми Бога, в Троице славимаго, Отца и Сына и Святаго Духа, ныне и присно и во веки веков.

Аминь.

О, священная главо, преподобне отче, преблаженне авво Евфимие, не забуди убогих твоих до конца, но поминай нас всегда во святых твоих и благоприятных молитвах к Богу. Помяни стадо твое, еже сам упасл еси, и не забуди посещати чад твоих. Моли за ны, отче священный, за дети твоя духовныя, яко имеяй дерзновение к Небесному Царю, не премолчи за ны ко Господу, и не презри нас, верою и любовию чтущих тя. Поминай нас недостойных у Престола Вседержителева, и не престай моляся о нас ко Христу Богу, ибо дана тебе бысть благодать за ны молитися. Не мним бо тя суща мертва, аще бо телом и преставился еси от нас, но и по смерти жив сый пребываеши.

Не отступай от нас духом, сохраняя нас от стрел вражиих и всякия прелести бесовския и козней диавольских, пастырю наш добрый. Аще бо и мощей твоих рака пред очима нашима видима есть всегда, но святая твоя душа со ангельскими воинствы, со безплотными лики, с небесными силами, у Престола Вседержителева предстоящи, достойно веселится. Ведуще убо тя воистину и по смерти жива суща, тебе припадаем и тебе молимся: молися о нас Всесильному Богу, о пользе душ наших, и испроси нам время на покаяние, да невозбранно прейдем от земли на небо, от мытарств же горьких, бесов воздушных князей и от вечныя муки да избавимся, и Небеснаго Царствия наследницы да будем со всеми праведными, от века угодившими Господу нашему Иисусу Христу, Емуже подобает всякая слава, честь и поклонение, со Безначальным Его Отцем и с Пресвятым и Благим и Животворящим Его Духом, ныне и присно и во веки веков. Аминь.

Веселися, пустыня нераждающая, благодушствуй, неболящая, яко умножи тебе чада муж желаний духовных, благочестием насадив, воздержанием воспитав в добродетелей совершенство. Того молитвами, Христе Боже, умири живот наш.

В честнем рождестве твоем радость тварь обрете и в Божественней памяти твоей, преподобне, благодушие прият многих твоих чудес, от нихже подаждь богатно в души наша и очисти грехов скверны, яко да поем: аллилуиа.

От леностнаго сердца хваление како принесу, окаянный – ужасаюся – и воспою великаго Евфимия? Но, сего надеявся мольбам, благодушием и тщанием мнозем песнь начну, и всем изреку того житие и рождение, и како сего родителие пояху Богу: аллилуиа.

Далее следует читать молитву всем святым и бесплотным небесным силам (см. выше).

Молитвенное воздыхание беременной женщины, которую Бог благословил плодом чрева

Всемогущи, чудотворящий, милостивый Боже, Создатель и Сохранитель неба и земли и всех тварей, Сам изрекший на всех христианских супругов благословение: раститеся и множитеся! И еще: вот наследие от Господа: дети, плод чрева, награда от Него.

Благодарю Тебя, что Ты соделал меня причастной этого благословения и дара Твоего в супружеском состоянии моем, и молю Тебя, благоволи благословить дарованный мне Тобою плод чрева, облагодатствовать и облаженствовать его Святым Духом Твоим, восприять в число возлюбленных чад Твоих и соделать причастным св. таинств церкви возлюбленного Сына Твоего, Господа моего Иисуса Христа, чтобы он чрез то освятился и очистился от наследственного греха, в котором он зачат. Господи Боже! Я и плод чрева моего суть чада гнева по естеству, но Ты, возлюбленный Отче, умилосердись над нами, и окропи плод чрева моего иссопом, да будет чист, омой его, и белее снега у белится. Укрепи и сохрани его во чреве до того часа, когда надлежит ему родиться на свет. От тебя не сокрыт был этот плод чрева моего, когда он образовался во чреве, Твои руки устроили его, Ты даровал ему жизнь и дыхание, и надзирание Твое да сохранить их. Сохрани меня от страха и испуга и от злых духов, которые желали бы повредить и сокрушить дело рук Твоих.

Даруй ему разумную душу, и соделай, чтоб возросло тело его здраво и неоскверненно, с целыми, здравыми членами, и когда наступить время и час, разреши меня по милости Твоей. Даруй мне крепость и силу к рождению, благопоспеши ему Твоею всемогущею помощью и облегчи страдания мои, потому что эти есть Твое дело, чудотворная сила Твоего всемогущества, дело милости и милосердия Твоего. Воспомни слово, изреченное Тобою: Ты извлек меня из чрева; к Тебе привержена я от рождения; от чрева матери моей Ты Бог мой; Ты упокоил меня у груди матери моей. Ты еси Бог, ведающий и, зрящий нужду всех людей; Ты сказал: жена, когда рождает, терпит скорбь, потому что пришел час ея. Господи! Ради этого сердечного сострадания Твоего и ради исполненного жалости сердца Твоего молю Тебя, благоволи облегчить скорбь мою, которую Ты предвидел, и изведи на свет плод чрева моего, с здравым, живым телом и неповрежденными, благообразованными членами.

Тебе поручаю я его, в Твои всемогущие, отеческие руки, в Твою милость и милосердие, и полагаю его, Господи Иисусе Христе, во святые Твои объятия, да благословиши и этот плодъ чрева моего, как благословлял Ты детей, приносимых к Тебе, когда говорил: «пустите детей и не препятствуйте им приходит ко Мне, потому что таких есть Царство Небесное». Спаситель! Так приношу я и Тебе и этот плод чрева моего; возложи на него благодатную руку Твою. Благослови его перстом Духа Твоего Святаго и облагодатствуй его, когда он придет в мир этот, святым, блаженным крещешем; освяти и обнови его к вечной жизни посредством возрождения, соделай его новою тварью, омой и очисти его кровь Твоею, соделай, чтоб был и он членом Святого Тела Твоего и святой Твоей христианской церкви, чтобы и из его уст произносилась хвала Тебе, и он был и навсегда пребывал чадом и наследником вечной жизни, чрез святое, горькое страдание Твое и смерть Твою и святое имя Твое, Иисусе Христе. Аминь.

Пред иконой Божией Матери Феодоровская о легких родах и сохранении плода

К кому воззову, Владычице, к кому прибегну в печали моей, к кому принесу слезы и воздыхания моя, аще не к Тебе, Царице небесе и земли. Кто исторгнет мя из тины грехов и беззаконий, аще не Ты, о Мати Живота, Заступнице и Прибежище рода человеческаго. Услыши стенание мое, утеши мя и помилуй в горести моей, защити в бедах и напастей, избави от озлоблении и скорбей и всяких недугов и болезней, от враг видимых и невидимых, умири вражду стужающих мне, да избавлен буду от клеветы и злобы человеческия; такожде от своея ми плоти гнусных обычаев свободи мя. Укрый мя под сению милости Твоея, да обрящу покой и радость и от грехов очищение. Твоему матернему заступлению себе вручаю: буди мне Мати и надежда, покров, и помощь, и заступление, радость, и утешение, и скорая во всем Помощница. О чудная Владычице! Всяк притекаяй к Тебе без Твоея всесильные помощи не отходит: сего ради и аз недостойный к Тебе прибегаю, да избавлен буду от внезапныя и лютыя смерти, скрежета зубнаго и вечнаго мучения. Небесное же Царствие получити сподоблюся и Тебе во умилении сердца реку: радуйся, Мати Божия, Предстательнице и Заступнице наша усердная, во веки веков.

Аминь.

Пришествием честныя Твоея иконы, Богоотроковице, обрадованный днесь, богохранимый град Кострома, якоже древний Израиль к кивоту завета, притекает ко изображению лица Твоего и воплотившагося от Тебе Бога нашего, да Твоим Матерним к нему предстательством присно ходатайствуеши всем под сень крова Твоего прибегающим мир и велию милость.

Взбранней Воеводе, Пренепорочней Деве Богородице, Заступнице нашей и Предстательству христиан непостыдному, явлением чудныя иконы Своея радование подавшей земле Российстей и вся верныя чада Церкве просветившей, благодарение усердно приносим Ти, Богородице, и припадающе пречудному образу Твоему, умильно глаголем. Спаси, Госпоже, и помилуй рабы Твоя, зовущия: Радуйся, Матерь Божия, Предстательнице и Заступнице наша усердная.

Молитвы Божией Матери пред Ея иконой «В родах Помощница»

Приими, Госпоже Богородительнице, слезная моления рабов Твоих, к тебе притекающих. Зрим тя на святей иконе во чреве носящую Сына Твоего и Бога нашего, Господа Иисуса Христа. Аще и безболезненно родила еси Его, обаче матерния скорби веси и немощи сынов и дщерей человеческих зриши. Темже тепле припадающе к цельбоносному образу Твоему, и умиленно сей лобызающе, молим Тя, всемилостивая Владычице: нас грешных осужденных в болезнех родити и в печалех питати чада наша, милостивно пощади и сострадательно заступи, младенцы же наша, такожде и родившия их, от тяжкаго недуга и горькия скорби избави. Даруй им здравие и благопомощие, да и питаемии от силы в силу возрастати будут, и питающия их исполнятся радостию и утешением, яко да и ныне предстательством Твоим из уст младенец и ссущих Господь совершит хвалу Свою.

О мати Сына Божия! Умилосердися на матери сынов человеческих и на немощныя люди Твоя: постигающия нас болезни скоро исцели, належащыя на нас скорби и печали утоли, и не презри слез и воздыханий рабов Твоих. Услыши нас в день скорби пред иконою Твоею припадающих, и в день радости и избавления прийми благодарная хваления сердец наших. Вознеси мольбы наша ко престолу Сына Твоего и Бога нашего, да милостив будет ко грехом и немощем нашим и пробавит милость Свою ведущим имя Его, яко да и мы, и чада наша, прославим Тя, милосердную Заступницу и верную Надежду рода нашего, во веки веков.

О, Пресвятая Госпоже Владычице Богородице, в земной жизни нас не оставляющая! К кому молитвы вознесу, к кому слезы и воздыхания принесу аще не к Тебе, всех верных Утешение! Со страхом, верою, любовию, Мати Живота, молю: Да вразумит Господь люди православныя во спасение, да даст рождать нам чад Тебе и Сыну Твоему во благоугождение, да соблюдет нас в чистоте смирения, в надежде о Христе спасения, и дарует нам всем, в покровах благодати Твоея, земное утешение. Храни нас под сению милости Твоей, Пречистая, молящимся о родах помози, наветов злых свободи, тяжких бед, напастей и смертей отврати. Даждь благодатное прозрение, дух сокрушения о гресех, даждь зрети всю высоту и чистоту дарованнаго нам Христова учения; храни нас от погибельнаго отчуждения. Да вси, благодарне воспевающе величия Твоя, сподобимся Небесного успокоения и тамо с возлюбленными Твоими, со всеми святыми прославим в Троице Единого Бога: Отца и Сына и Святаго Духа, ныне и присно, и во веки веков. Аминь.

Ангелов лицы благоговейно Тебе служат, и вся Силы Небесные немолчными гласы Тя ублажают, Помощнице в родах, усердно молим Тя, Богородице, да пребудеши в славе Господа, чрез икону Тобою явленную и светозарный луч славы чудес Твоих да восхитит от тьмы, с верою Тебе молящихся, и вопиющих Богу: Аллилуиа.

Акафист Божией Матери пред иконой Ея «В родах Помощница»

Избранней от всех родов Помощнице рода христианского, к Богоугодней жизни рождающей, благодарственная пения приносим Ти, Богородице, о даровании чудныя иконы Твоея. Ты же, яко скорая и всемилостивая верных Заступнице, не остави нас в скорбех, да зовем Ти: Радуйся, Помощнице в родах, чад Своих к Царю Славы приводящая.

Ангел предстатель послан бысть рещи Богородице: Радуйся, егда Бог Слово воплощащеся во утробе Ея; и мы грешнии, дивящеся святому Рождеству, пред иконою чудною Твоею с верою и надеждою вопием Ти: Радуйся, радость Христова Рождества познавшая; Радуйся, Сына Света нам даровавшая. Радуйся, скорби гонений с плодом во чреве претерпевшая; Радуйся, в подвигах материнских на земли преуспевшая. Радуйся, скорби родов в радость претворяющая; Радуйся, Твоею любовию нас для Неба созидающая. Радуйся, подвигом жития Твоего просветившая; Радуйся, чудными родами весь мир удивившая. Радуйся, Помощнице в родах, чад своих к Царю Славы приводящая.

Видящи, Всенепорочная, во славе Сына Твоего пред нами пребывающая, яко скорби от гордости сердца верных рабов Твоих, яже гневнаго ради Божия вразумления, избавляют, благоволила еси явити икону Твою, чудесы ю прославляющи, да покрываемии Твоею любовию с надеждою вопием Богу: Аллилуиа.

Жизнодателя рождшая, Пресвятая Богородице, благодатное попечение женам в родах утвердила еси, разуму нашему просвещение свыше исходатайствовала еси, да познаем, что есть воля Божия благая, угодная и совершенная. Мы же дивящеся свыше благодатному укреплению со слезами радости вопием Ти: Радуйся, от грехов нас отвращающая; Радуйся, трудную долю жен облегчающая. Радуйся, сердца наша любовию Твоею умягчающая; Радуйся, молитвами Твоими Сына нам в помощь призывающая. Радуйся, Рождество Сына Твоего никогда не забывающая; Радуйся, в родах жен христианских не оставляющая. Радуйся, в духовном рождении всех благословляющая; Радуйся, в свет Сына Твоего неизменно призывающая. Радуйся, Помощнице в родах, чад Своих к Царю Славы приводящая.

Сила Вышняго благодатию Богоматери землю Русскую освятила, чад духовных Своих измлада любовию умудряющи и воинов Христовых к чистоте Православия непрестанно призывающи, мы же с верою прибегаем ко Господу, пред иконою Твоею, Богородице, вопием Богу: Аллилуиа.

Имуще Тя, Заступнице усердная рода христианскаго, яко Мати чад Твоих покаянию и смирению нас научаеши, токи чудес нам в укрепление от пречестныя иконы Твоея милостиво источаеши, благодатию от Бога во спасение всех нас осеняеши. Сего ради зовем Ти сице: Радуйся, явлением иконы Твоея мглу лютых обстояний отгоняющая; Радуйся, во святей Руси, верных чад православною верою окрыляющая. Радуйся, боли при родах благодатию Святаго Духа ослабляющая; Радуйся, любовь Твою всегда нам источающая. Радуйся, в скорбех для многих жен прозрение; Радуйся, дарующая любящим Сына Твоего молитвенное попечение. Радуйся, сердца наша радостию родов умягчающая; Радуйся, в святость и чистоту детства нас возвращающая. Радуйся, Помощнице в родах, чад Своих к Царю Славы приводящая.

Бурю лютых смятений в стране нашей воздвигнутых врагами Церкви, Пресвятая Дево, укрощаеши, чад Твоих, заблудших в покаянии и скорбех, умудряеши, души жен воинов Христовых в родах надеждою светлою укреплявши, научая тем люди Твоя благодарственно пети Богу: Аллилуиа.

Слышавше православний людие сокровенную тайну, яко предстательством Твоим, Богородице, суд об отечестве нашем преложен на милость, и дивящеся свыше благодатному Твоему попечению, благоговейно вопием Ти сице: Радуйся, наша семьи от уныния избавляющая; Радуйся, благодатным Твоим покровом младенцев осеняющая. Радуйся, скорби в покрытие грехов нам попускающая; Радуйся, чад наших в святости охраняющая. Радуйся, нашу юность светом истины просвещающая; Радуйся, венчанные семьи пред Богом с любовию хранящая. Радуйся, к таинству венчания семьи призывающая; Радуйся, от блуда смертнаго всех верных предостерегающая. Радуйся, Помощнице в родах, чад Своих к Царю Славы приводящая.

Боготечная звезда явися нам, Богородице, честная Твоя икона, всех скорбящих в родах жен лучами чудес Твоих осиявающая, блуждающих в духовнем мраце к свету Сына Твоего призывающая, в греховных страстях утопающих, в благодатный мир Бога Отца облекающая и на путь спасения утешением Святаго Духа наставляющая. Мы же, верою обретши радости сия, вопием к Богу: Аллилуиа.

Слышавше православний людии, яко святую икону Твою, Богородице, Господь многими чудесы прославляет: скорби жен христианских в родах облегчает, сердца отец и матерей во славу Божию радостию наполняет и икону Твою чудную, яко освящение, яко щит и вспоможение русский народ почитает. Сего ради вопием Ти сице: Радуйся, жилище и доме Христа Бога нашего; Радуйся, спасение русскаго народа в отчуждение от Бога духом впавшего. Радуйся, христиан непобедимая Хранительнице; Радуйся, наших грехов пред Богом Искупительнице. Радуйся, благодатней надеждой сердца жен в родах наполняющая; Радуйся, к духовному рождению в таинстве Крещения неустанно призывающая. Радуйся, добродетелей великое стяжание; Радуйся, Божие к немощным благоволение. Радуйся, Помощнице в родах, чад Своих к Царю Славы приводящая.

Пред пречистым Твоим образом проповедаем, Госпоже Богородице, великая Твоя милости, яко семьи христиан ограждавши, церкви домашние благодатию Святаго Духа покрывавши, жен со чадами защищавши, и ведуще Тя воистину Помощницу непобедима, приносим Ти славословия сия и радостно вопием Богу: Аллилуиа.

Воссиявши просвещение истинное, Пречистая Богородице, явился чудная икона Твоя, родителям на утешение, рассеянным семьям в воссоединение, восстающим на Господа неверием в предупреждение, всем нам в укрепление и в вечное блаженство во Христе Господом дарованного искупления. Мы же дивящееся о нас попечению, благодарно вопием Ти: Радуйся, от внезапной смерти нас избавляющая; Радуйся, мрачных духов святостию Твоею отгоняющая. Радуйся, наша отступления от Бога любовию Твоею покрывающая; Радуйся, истинно нас молится научающая. Радуйся, к долготерпению в скорбях и недугах нас приклоняющая; Радуйся, богоносные руце Твои за нас грешных к Сыну в молитве непрестанно возносящая. Радуйся, николиже верных Сыну Твоему заступлением не оставляющая; Радуйся, немощных благодатным Покровом Твоим покрывающая. Радуйся, Помощнице в родах, чад Своих к Царю Славы приводящая.

Хотяй всем человеком спастися и в истине просветитися, Премилосердный Господь, усынови нас Матери Своей, женам христианским в родах в поможение, чадам нашим в благодатное небесное окормление. Мы же обряще от Бога радости сия со слезами вопием Вседержителю: Аллилуиа.

Творец и Владыка наш Господь, за грех наказа род человеческий и рече жене Адама:»В болезнех родиши чада своя«, сотвори сие в наказание, для многих людей ко вразумению спасения ради душ их. Сего ради и мы, Владычице, припадающе к пречистому образу Твоему, усердно молим Тя: милосердия двери отверзи нам, вопиющим Ти сице: Радуйся, неприступнаго Божества селение; Радуйся, Ангельское и наше непрестанное удивление. Радуйся, Божией милости и любви исполнение; Радуйся, Подательнице спасительнаго в родах вспоможения. Радуйся, правды святой Попечительнице; Радуйся, любови и доброты непоколебимая Узорешительнице. Радуйся, в гордости закосневших заступлення Твоего лиша ющая; Радуйся, от крещенных младенцев радостный взор Твой не отвращающая. Радуйся, Помощнице в родах, чад Своих к Царю Славы приводящая.

Странно маловерующим слышати како образ Твой святый токи благодати источает, грешным в покаянии к Тебе пришедшим радость дарит, исцелением скорбящих и болящих жен в родах Бога славит, мы же с верою поклоняемся ему. Образ честью к первообразу восходит, и всемирно прославляя Тя с радостию поем Богу: Аллилуиа.

Вся бывши горе земных не оставляеши, Пресвятая Богородице, узы страстей благодатным попечением ослаблявши, в покаянии притекающим предстательством пред Богом очищаеши, искуплением Христовым сердца наша преображаеши. Сего ради величающе воспеваем Ти тако: Радуйся, чрез покаяние к Богу приводящая; Радуйся, покаянием нашим двери райские отверзающая. Радуйся, родительским покаянием от чад болезни отвращающая; Радуйся, покаянием мир духовный в семьях верных Утверждающая. Радуйся, покаянием бесовские разлады в семьях угашающая; Радуйся, покаянием церковным со Христом нас вновь соединяющая. Радуйся, в покаянии приходящих преображающая; Радуйся, чрез покаяние заступлением Твоим пред Сыном спасающая. Радуйся, Помощнице в родах, чад Своих к Царю Славы приводящая.

Всякого естества ангельскаго превысшая явилася еси, Пресвятая Дево, Бога бо зачала еси плотию, Господа во утробе Твоей вместила еси, темже яко Святейшую и Славнейшую у Престола Царя царей величающе Тя, вопием о Тебе Богу: Аллилуиа.

Ветийства Боговещанных проречений ныне зрим о Тебе сбывшася, Богородице, яко воистину Бога плотию родила еси нам. И будущего Царствия Божия не лиши еси нас, покровом твоим нас от козней мира сего оберегающи. Мы же обетованное блаженство во Христе в молитвах призываем и в покаянии вопием Ти: Радуйся, твердое Православия укрепление; Радуйся, душ наших скорое Спасение. Радуйся, отчужденных от Бога к вере возрождение; Радуйся, духовное наше прозрение. Радуйся, в чистоте Православия нас оберегающая; Радуйся, от греховного падения нас изводящая. Радуйся, вопиющих к Тебе скорое У слышание; Радуйся, чадородие Благословляющая. Радуйся, Помощнице в родах, чад Своих к Царю Славы приводящая.

Спасти хотящи многие жены в родах от обдержащих их страстей и напастей, чудную икону Твою, Богомати, даровала еси, еяже ради козни диавола утихают, смертоносные болезни исчезают, боли в родах ослабевают, да вси, видяще являемую Тобою милость, вопиют со умилением Богу: Аллилуиа.

Стена еси, Богородице Дево, Святей Руси и народу ея ограждение, врагов Православия Обличение, женам-матерям сугубое Утешение, малым чадам благодатное Попечение. Тем же благодаряще Тя, вопием Богу: Радуйся, прославляющих Тя от бед избавляющая; Радуйся, позабывших Тя посрамляющая. Радуйся, православных матерей Славо и Попечение; Радуйся, сохраняющих целомудрие верное Ограждение. Радуйся, спасительный елей кающихся; Радуйся, Царица Небесная всех во Христе рождающихся. Радуйся, радости наша умножающая; Радуйся, младенцев и матерей сугубою любовию Твоей защищающая. Радуйся, Помощнице в родах, чад Своих к Царю Славы приводящая.

Пение хвалебное и благодарственное приносим Ти, Пресвятая Владычице: под покровом Твоим в Православней Церкви по милости Божией рождаемся, в благодатном окормлении Твоем неизменно умудряемся, заступлением Твоим во Христе искони спасанемся, и возложивше на Тя упование, радостно вопием Богу: Аллилуиа.

Светоприемная свеща истиннаго света сущим нам на земли явльшися, души просвещаеши, чтущих Тя в вере во спасение наставляеши, младенцев в утробах матерей охраняеши, да поем Ти сице; Радуйся, в рождении чад скорби ослабляющая; Радуйся, грехи наша Твоими молитвами к Сыну отпускающая. Радуйся, воинам Христовым жен смиренных посылающая; Радуйся, непорочность отроковиц охраняющая. Радуйся, духовно всех невидимо окормяющая; Радуйся, Твоею любовию в бедах нас покрывающая. Радуйся, от хульныя мыслей предостерегающая; Радуйся, от умерщвления неродившихся младенцев всех отвращающая. Радуйся, Помощнице в родах, чад Своих к Царю Славы приводящая.

Благодать небесныя славы Твоея дати восхотевши почитающим Тя с любовию, Владычице, по вере даруеши чрез икону Твою Богообщение, знамения и чудеса исцеления, от духовных скорбей избавление. Мы же ведевши сокровища сия, велегласно вопием к Богу: Аллилуиа.

Поюще Твоя чудеса, бывшая в древняя и настоящая времена, хвалим Тя, Богородице, верным врата в жизнь вечную молитвами Твоими отверзающая, благодатию Святаго Духа в земной жизни защищающая, ко Господу людей избранных Твоею любовию привлекающая, мы же упование по Бозе возлагающе на Тя с покаянием вопием и сице: Радуйся, отчаенных спасение; Радуйся, погибающих оживление. Радуйся, от бед избавление; Радуйся, духовней радости утверждение. Радуйся, обидимых Утешительнице; Радуйся, гонимых Покровительнице. Радуйся, в малом верных укрепляющая; Радуйся, возлюбивших Господа окормляющая. Радуйся, Помощнице в родах, чад Своих к Царю Славы приводящая.

О Всепетая Мати, Помощнице в родах, рождшая всех святых святейшее Слово, Надеждо духовнаго нашего пробуждения и во всем благаго поспешения, в родах телесных, Благодатная, женам православным утешение, Царствия Небеснаго наследники всех сотвори, верно вопиющих Богу: Аллилуиа, Аллилуиа, Аллилуиа.

Ангел предстатель послан бысть рещи Богородице: Радуйся, егда Бог Слово воплощащеся во утробе Ея; и мы грешнии, дивящеся святому Рождеству, пред иконою чудною Твоею с верою и надеждою вопием Ти: Радуйся, радость Христова Рождества познавшая; Радуйся, Сына Света нам даровавшая. Радуйся, скорби гонений с плодом во чреве претерпевшая; Радуйся, в подвигах материнских на земли преуспевшая. Радуйся, скорби родов в радость претворяющая; Радуйся, Твоею любовию нас для Неба созидающая. Радуйся, подвигом жития Твоего просветившая; Радуйся, чудными родами весь мир удивившая. Радуйся, Помощнице в родах, чад своих к Царю Славы приводящая.

Избранней от всех родов Помощнице рода христианского, к Богоугодней жизни рождающей, благодарственная пения приносим Ти, Богородице, о даровании чудныя иконы Твоея. Ты же, яко скорая и всемилостивая верных Заступнице, не остави нас в скорбех, да зовем Ти: Радуйся, Помощнице в родах, чад Своих к Царю Славы приводящая.

Пресвятой Богородице перед Ее иконой «Скоропослушница»

Преблагословенная Владычице, Приснодево Богородице, Бога Слова паче всякаго слова на спасение наше рождшая, и благодать Его преизобильно паче всех приявшая, море явльшаяся Божественных дарований и чудес приснотекущая река, изливающая благость всем, с верою к Тебе прибегающим! Чудотворному Твоему образу припадающе, молимся Тебе, всещедрей Матери человеколюбиваго Владыки: удиви на нас пребогатыя милости Твоя и прошения наша, приносимая Тебе, Скоропослушнице, ускори исполнити все, еже на пользу во утешение и спасение коемуждо устрояющи. Посети, Преблагая, рабы Твоя благодатию Твоей, подаждь недугующим цельбу и совершенное здравие, обуреваемым тишину, плененным свободу, и различными образы страждущих утеши. Избави, Всемилостивая Госпоже, всяк град и страну от глада, язвы, труса, потопа, огня, меча и иныя казни временныя и вечныя, Матерним Твоим дерзновением отвращающи гнев Божий; и душевнаго разслабления, обуревания страстей и грехопадений свободи рабы Твоя, яко да непреткновенно во всяком благочестии поживше в сем веце, и в будущем вечных благ сподобимся благодатию и человеколюбием Сына Твоего и Бога, Емуже подобает всякая слава, честь и поклонение со Безначальным Его Отцем и Пресвятым Духом, ныне и присно и во веки веков. Аминь.

К Богородице притецем сущии в бедах, и святей иконе Ея ныне припадем, с верою зовуще из глубины души: скоро наше услыши моление, Дево, яко Скоропослушница нарекшаяся, Тебе бо ради раби Твои в нужду готовую помощницу имамы.

В мори житейстем обуреваемии, треволнению подпадаем страстей и искушений. Подаждь убо нам, Госпоже, руку помощи, якоже Петрови Сын Твой, и ускори от бед избавити ны, да зовем Ти: радуйся, всеблагая Скоропослушнице.

Перед этой иконой также молятся при недостатке молока.

Пресвятой Богородице перед Ее иконой «Целительница»

Приими, о, Всеблагословенная и Всемощная Госпоже Владычице Богородице Дево, сия молитвы, со слезами Тебе ныне приносимыя от нас, недос тойных раб Твоих, ко Твоему цельбоносному образу пение возсылающих со умилением, яко Тебе Самой зде сущей и внемлющей молению нашему. По коемуждо бо прошению исполнение твориши, скорби облегчаеши, немощным здравие даруеши, разслабленныя и недужныя исцеляеши, от бесных бесы прогоняеши, обидимыя от обид избавлявши, прокаженныя очищаеши и малыя дети милуеши; еще же, Госпоже Владычице Богородице, и от уз и темниц свобождаеши и всякия многоразличныя страсти врачуеши: вся бо суть возможна ходатайством Твоим к Сыну Твоему, Христу Богу нашему. О, Всепетая Мати, Пресвятая Богородице! Не престай молитися о нас недостойных рабах Твоих, славящих Тя и почитающих Тя, и поклоняющихся со умилением Пречистому образу Твоему, и надежду имущих невозвратну и веру несумненну к Тебе, Приснодеве Преславней и Непорочней, ныне и присно и во веки веков. Аминь.

Яко Пресветлая Звездо, просия Божественными чудесы святый Твой образ Целительнице. Подаждь убо и нам, Богородице Марие, исцеление недугов душевных и телесных, спасение и велию милость.

Молитва беременных женщин о благополучном разрешении от бремени

О, Преславная Матерь Божия, помилуй меня, рабу Твою, и прииди ко мне на помощь во время моих болезней и опасностей, с которыми рождают чад все бедные дщери Евы. Вспомни, о Благословенная в женах, с какою радостию и любовию Ты шла поспешно в горнюю страну посетить сродницу Твою Елисавету во время ея беременности и какое чудесное действие произвело благодатное посещение Твое и в матери, и в младенце. И по неисчерпаемому благосердию Твоему даруй и мне, уничиженней рабе Твоей, разрешитися от бремени благополучно; даруй мне сию благодать, чтобы дитя, покоящееся теперь под моим сердцем, пришедши в чувство, с радостным взыгранием, подобно святому младенцу Иоанну, поклонялось Божественному Господу Спасителю, Который из любви к нам, грешным, не возгнушался и Сам стать Младенцем. Неизглаголанная радость, которою преисполнилось девственное Твое сердце при воззрении на новорожденного Твоего Сына и Господа, да усладит скорбь, предстоящую мне среди болезней рождения. Жизнь мира, мой Спаситель, рожденный Тобою, да спасет меня от смерти, пресекающей жизнь многих матерей в час разрешения и да причтет плод чрева моего к числу избранных Божиих. Услыши, Пресвятая Царице Небесная, смиренную мольбу мою и призри на меня, бедную грешницу, оком Твоея благодати; не постыди моего упования на Твое великое милосердие и осени меня. Помощница христиан, Исцелительница болезней, да сподоблюсь и я испытать на себе, что Ты – Матерь милосердия, и да прославлю всегда Твою благодать, не отвергшую никогда молитвы бедных и избавляющую всех призывающих Тебя во время скорби и болезней. Аминь.

Преподобной Мелании Римляныне

О, святая угоднице Божия, преподобная мати Мелание! Подвигом добрым подвизавшися на земли, восприяла еси на Небесех венец правды, егоже уготовал есть Господь всем любящим Его. Темже взира-юще на святый твой образ, радуемся о преславнем скончании жительства твоего и чтем святую память твою. Ты же, предстоя Престолу Божию, приими моления наша и ко Всемилостивому Богу принеси, о еже простити нам всякое прегрешение и помощи нам стати противу кознем диавольским, да избавльшеся от скорбей, болезней, бед и напастей и всякаго зла, благочестно и праведно поживем в нынешнем веце и сподобимся предстательством твоим, аще и недостойни есмы, видети благая на земли живых, славяще Единаго во святых Своих славимаго Бога, Отца и Сына и Святаго Духа, ныне и во веки веков.

Аминь.

В тебе, мати, известно спасеся, еже по образу: приимши бо крест, последовала еси Христу, и деющи учила еси презирати убо плоть, преходит бо; прилежати же о души, вещи безсмертней; темже и со ангелы срадуется, преподобная Мелание, дух твой.

Девства чистоты возлюбши, и обручника к благим увещавши, премножество богатства расточи в пребывание иночествующим, богоблаженная, и обители воздвиже. Темже в небесная обители вселися, поминай нас, Мелание всечестная.